مناظره السى ان ان

29 Apr

خدوا بس متابعه  مستخدمى تويتر للحوار

او

ل حاجه اتاكدت بما لايدع مجالا للشك ان اللواء لوقا بباوى مش الحكومه

مصدروهولنا عشان هما مش عايزين يتكلموا لا لان كل النظام فى مصر نبيل لوقا بباوى ونشات القصاص كمان بس هما بس الى بيتكسفوا

……………

تانى حاجه

لو البرادعى اخلاقه زى عز كان ممكن يقول كلام يهز الامريكان زى ما عز عايز يهزهم باحمدى نجاد وحزب الله والاخوان والشيوعيين بس البرادعى ما يهموش الامريكان البرادعى مش همه الا مصر فقط عشان كده بيتكلم عن مصر ما بيرميش كلام زى ما المشمهندس بيرمى

……………..

تالت حاجه

انا زعلان من عمرو اديب لان سعد الدين ابراهيم ما قالش حاجه غلط

………

رابع حاجه

حابب فى البرادعى اجاباته المباشره ولمست دى فيه من اول مؤتمر سمنود والنهارده لما اتسال عن المؤسسات المؤثره فى اعاقه وصوله للرئاسه جاوب بكل صراحه على موضوع الجيش

…….

خامس حاجه عز كان فاكر نفسه مزاكر بس منظره وحش اوى برده هههههههه

………………………………………………………………………………………………

الى بيسعوا للتغيير فى مصر مش زى الى فى السلطه الى فى السلطه بيدفعوا فلوس للمؤسسات الامريكيه لتلميع صورتهم الى عايزين يغيروا بيستعينوا بالشعب للتغيير

………………………

التغيير اولا

البرادعى 2011 رئيسا توافقيا لمصر

Continue reading

Advertisements

الأمل فى الطالع والنظام فى النازل

9 Apr

كان نفسي جدا اكتب عن الزيارة للمنصورة وأجيب التلات صور اليتيمة إلى عرفت ارفعهم يومها


مباشره من ارض منيه سمنود الباسلة إلى الناس إلى نزلوا فيا شتيمة على توتير لكون الحدث غامض لكل الصحفيين والمتابعين


وكان نفسي اكتب عن رجاله 6 ابريل والظلم


إلى وقع عليهم من ناس وطنيه قبل اللوطية والتقليل منهم والتنظير على قفاهم رغم إنهم أرجل شباب في مصر وكل إلى شارك في اليوم ده باى حاجه يشكر كان نفسي اكتب عن يوم مطارده الحرس لينا جوه الجامعة وأعضاء الاتحاد إلى خلونا نقع على نفسنا من الضحك والعساكر إلى كانوا متشوقين يعرفوا إيه الصور دى إلى إحنا عارضنها دى كان نفسي اكتب عن الناس إلى خلوني أراجع حساباتي لما شوفتهم عطشانين للتغيير


كنت نفسي اكلم عن المعارضة المصرية الوطنية إلى جزء كبير منهم بدا يشك في نفسه وفى إمكانياته رغم أنهم اكتر ناس في مصر ربنا هايكرمها كان نفسي أتكلم عن قرغيزيا كان نفسي أتكلم عن الكرم المعروف بيه الكوايته كنظام ونخبه إنهم يمسوا على المصريين دايما ياما بتعذيب احدهم يا بتلفيق قضايا ومع ذلك كل قرايبى الى محتليين الكويت يجوا يقولولك يا ريت ياخى أقسامنا زى أقسام الكويت كان نفسي اضرب نار تحيه لمجموعات الدعم إلى بره والى هايجمعوا توقيعات بالعبيط إن شاء الله كان نفسي أتكلم عن أهميه التوقيعات دى كان نفسي أتكلم عنى مبادرة احد اصحابى والى خلى المنتدى الهندسي بتابعه داعم للجبهة الوطنية كان نفسي أتكلم عن البرادعى المنظم إلى جاى ما بيهزوش كان نفسي أتكلم عن الناس الوطنية إلى بدأت تقتنع بيه من نخبه شباب مصر كان نفسي أتكلم واحكي عن أيمن نور الراجل إلى بجد النظيف من جواه كان نفسي أتكلم عن أبو النجا المهندس المحترم في مواجهه تدليس صبحي وحماقى كنت عايز أتكلم عن أهميه ضم عناصر مختلفة اكتر من الموجودة الوقتي فى الجبهة كان نفسى اتكلم عن فشلى فى حل معضله انى مش قابل باسم الجمعية ومسميها الجبهة


ليه كان نفسي أتكلم عن هدوم البرادعى الى جالنا بيها المنصوره كنت عايز اتكلم عن ردوده المباشرة للناس وكنت عايز أتكلم عن موهبه خارقه يتمتع بها قنديل كنت عاير اقول رايى ضد كلام الشاعر عبدالرحمن يوسف كنت عايز اتكلم مش عايز اتكلم عن سر اختفاء جمال مبارك مش عايز اتكلم عن ابداعات عبد الله كمال ولا زميله محمد ابراهيم ولا اكسلنت ناوناوا ولا على ا/فهمي هويدى إلى كتب مقاله مش هنسهاله أبدا لما جه البرادعى مش موضوع اتفاق واختلاف لانى مش قده بس مقدار احترامى لكاتب لما يحاول يكون مؤثر اكثر منه منظر مثال ذلك القدير إبراهيم عيسى إلى للأسف خدته الحماسة لما وصل البرادعى وقال كلام زيي بالضبط زى ما يكون قرا المدونة وشاف الودع إن البرادعى ممكن يكسب الانتخابات من غير تعديل دستور أو غيره كنت عايز أتكلم عن ناس الواحد بيشوفهم كل يوم ينضموا للجبهة يضيفوا كنت عايز اتكلم على نغمه كترت الايام دى ان ممكن حسنى مبارك يلغى الطوارئ ويشغل الارهاب وتعليقات غريبه من الناس ان ممكن مبارك برده يسيب الليلة للبرادعى ويخلع هو

كنت عايز أتكلم عن النجاح الساحق إلى حققه البرادعى على الفضاء الالكترونى ويبقى له الناس الى استقبلوه بالترحاب بالمنصوره الى يعرفوه عشان مواقفه والى ما يعرفهوش لأنهم محتاجين اى حد يسال عنهم كنت عايز احيى شباب منيه سمنود الى وقف ضد البرادعى اكانه وزير فى حكومة نظيف وقفوله يقرروه هو أنت لو مسكت إحنا ايه الى ضمنا إن انت هاتقضى على سيطره رجال الأعمال

وبتاع وساعتها حلمت الله هو ده ممكن يحصل فعلا ياااه يا سلاااام ياااااااااااااااااااااااااااااااااه البرادعى ريس يا جدعان يااااااااااسلام بجد كنت عايز اتكلم عن توقعاتي الى شغاله تمام لحد الوقتي عن المستقبل بس إلى معايا فى المشروع واجعنلى دماغي بتكملة الطرق وكمان عشان ما اطولش عليكم اكتر من كده ربنا يكملها على خير يا رب

…………….

كل الى اخدت منهم صور من غير استئذان يسامحونى

الصحافه الشعبيه

3 Apr

هل يوجد خلاف بين الصحافه الشعبيه والصحافه الاحترافيه ؟
طبعا تختلف الرؤيه للاجابه على هذا السؤال حسب الظروف المحيطه والبيئه السياسيه والاجتماعيه فمثلا تبدا العلاقه بينهم فى اى مجتمع سلطوى حيث يكون العداء على اشده بينهما وذلك لان اصحاب المؤسسات الاعلاميه التقليديه يحافظون على استمرار وسائلهم فى البث بالالتزام الصارم بالحدود المقيده للحريات بينما يحاول اصحاب الصحافه الشعبيه الى كسر هذا الاحتكار منهم للمعلومات

حواس والبرادعى والتوت

17 Feb

بسم الله الرحمن الرحيم


خلاص يا جماعه قضى الأمر خلاص البرادعى جاى خلاص 19 فبراير يا ناس هانعمل أيه باه إحنا …………..حاجات كده ورا بعضها خدت بالى منها

أول حاجه الناس الوطنيين الى كانوا واخذين موضوع البرادعى ده تريقه على الناس الى نظموه وعلى الشباب الى بالفعل قاد حمله محترمه خلت مصر تشوف لون ابيض في وسط السواد ده رجعوا في رأيهم طبعا إحنا وهما متفقين إن البرادعى مش هايشقلب مصر ودي قولتها في أول تدوينه كتبتها هنا بس الى أنا متأكد منه انه خلاص قضى الأمر البرادعى رئيس مصر خلاص

تانى حاجه :النصيحة الى أداها عمرو أديب على الهوا لحسنى مبارك والى كان باين أوى انه بيخاطبه بيها لأنه يعرف إن الريس متابع لبرنامجه بس إن الداخلية ما تعملش حاجه مع الناس الى هايستقبلوا البرادعى بس طبعا الريس أكثر خبره والقيادات الى حوالبه عارفين إن العلاج الأنجع والى اثبت نجاحه طوال 28 سنه وهو أسلوب الضرب على الدماغ وبالفعل بداوا في اعتقال الناس الى في 6 ابريل احمد ماهر المنسق العام طبعا لإجهاض اى استقبال محترم للبرادعى


…………………………………

حاجه بس عايز أقولها عشان ما نصدمش في يوم الجمعة الجاى 19 فبراير التغطية الاعلاميه هاتبقى كبيره جدا هانلاقى وكالات أنباء عالميه بتغطى أرجو إن البرادعى يسلم على الناس الى مستنياه  وأتوقع حدوث ده بعد الوصول وان كنت شايف إن البرادعى مش في صالحنا انه يرجع تانى بره وانه يفضل هنا في مصر

…………………………………………………………………..
من ناحية باه  النظام المصري في اعتقادي الوقتي إن فكره البرادعى ومنافسته للننوس هي الى مسيطرة دلوقتى على دواير النظام كلها الى بالفعل بات مرتبكة جدا من موضوع البرادعى ده ودفعت بكل طاقتها لأشاعه إن البرادعى ما ينفعش ازاى ما تعرفش ما ينفعش ليه  طب لو هو ما ينفعش الننوس ينفع ازاى ههههههه حتى وزير الصحة قالك ان البرادعى مش نافع هههههه ازاى يا عم الأمور ما تعرفش المهم خطط النظام هاتعتمد على شقين إنهم يضايقوا الناس الداعمة للبرادعى من جهه ومن جهه ثانيه يشغلوا الناس الى تحت أيديهم في الإعلام  من باه عمرو أديب و48 ساعة

والبيض بيضك وغيرهم في حملات ضد البرادعى وطبعا باكورة نجاحهم طبعا في موضوع الداعمين الى عملوه في حزب الوفد الى كان المصريون هايقبلوا إن البرادعى يخشه لما له من تاريخ نضالي وبتاع بعكس الدستوري الحر الى عايز يركب الموجه بس طبعا الناس الى في الوفد مسيطر عليهم من جانب الحزب الوطني عشان كده بداية من اباظه وفؤاد بدراوى ومنير فخري كلهم كونوا جبهة ضد الناس الى بتساند البرادعى في  الحزب لان فعلا لو كان البرادعى في الوفد كانت هاتفرق جامد أوى بسهوله ترشحه للرئاسة وان كنت انا ما باحبش موضوع الترقيع في التعامل مع موضوع كيفيه ترشيح البرادعى للرئاسة بس مع كده كان انضمام البرادعى للوفد كان هايبقى في فرق كبير

……………………………………..
موضوع استقبال رسمي من الحكومة أو النظام للبرادعى أتوقع أنهم هايبعتوا حد رسمي بس مش منصب أوى عشان يؤثروا في نفسيه البرادعى بس الناس الى هاتحضر  كفاية

علينا كده

…أتمنى انى اعرف أروح استقبله ولو ما كانشى ممكن أروح مع الناس الى هاتروحله بيته تانى يوم

………………………………………………………………………………………………………..

في أخر التدوينه وعشان ما اطولش عليكم بالنسبة ليا انا سستمت نفسي على إن البرادعى رئيس ويوافقني في ده العميد ميت الى سال على تويتر  هو لو البرادعى مسكنا هانعرف نحتج وكده يعنى ههههههههههه

………………………………………………………………………………………………………………………………………………………………………………………………………………
أخر حاجه باه  من بضانيات النظام المصري إن خبر اكتشاف وفاه توت عنخ أمون تصدر نشره التليفزيون المصري يعنى في كلمه عايز أقولها حمرا يا نظام يا مصري أما نشوف هاتعملولنا تقرير كده على الإعلام المصري عن زيارة البرادعى لمصر زى ما عملتم لتوت عنخ أمون طبعا

………………
لا أتوقع ذلك

………………………………………………………
قائمه محدثه للجهات المستقبلة للبرادعى

1-    شباب 6 ابريل

2-    الكاتب علاء الاسوانى

3-    أستاذ /حسن نافعة (جبهة ضد التوريث)

4-    ناس من مصر بدون انتماء لاى أحزاب أو جهات

معارضه

5-    الشاعر عبد الرحمن يوسف

6-

الحملة الشعبية لترشيح دكتور البرادعى للرئاسة

7- قيادات من كفايه

وغيرهم وجارى تحديث ألقائمه في حال التأكد التام من

حضور احد الشخصيات المهمة

……..

ملحوظة أيمن نور قال انه هايزور البرادعى في بيته لأنه

مرتبط بميعاد في بورسعيد

وجدتهااااااااااااااااااااااااااااااا****زى ما قال الريس منتخبنا كويس

10 Feb

اعلنها انا المدون الصغير انسان مصرى عن التوبه الخالصه والاعتذار الكامل الى كل من اسات لهم على هذه المدونه الحقيره وذلك بعد اكتشافى العديد من الاسرار والخبايا الى خليتنى عرفت الحقيقه المره ان كل الناس فى كل الدنيا حلوه كميله وانا الى سبب فساد الكون

اولا اعتذار للحكومه المصريه

انا عارف ان حكومتنا النظيفه بتعمل الى عليها وزياده والدليل على كده التقدم الى فى البلد الى ما بينكروش الا جاحد ومع ذلك الحكومه لحكمه كبيره لا نعرفها نحن واكشفها لاول مره  الان وهى ان الحكومه استفادت من دروس الماضى ان اسرائيل ضربتنا لما عبد الناصر نمى بالبلد فالحكومه عملت حاجه اشطه اوى انها بتخلى البلد تتقدم ومع ذلك بتطلع اشاعات على نفسها فى الصحف المعارضه انها ما بتعملش حاجه ليه عشان تضحك على اسرائيل وما تضربناش بالصواريخ والشماريخ

ثانيا الاعتذار موصول لرجال الاعمال المالكين للبلد

الناس الى ما تعرفوش ان  رجال الاعمال دول ولا حاجه دول بس حجه عشان الناس يقولوا ان البلد فاسده والتقدم الى فيها ما يبانش علينا ودا بالطبع اثر فى الناس الى برا الى بيترصدوا بمصر وخلاهم يصدقوا ان بلدنا وحشه

وانهم فى الاخر هاتتاخد منهم الفلوس دى بعد انهيار امريكا واسرائيل وايران والدول الى بتستهدف مصر

ثالثا الناس الى فى الحكومه بس الى مش قيادات يعنى

دول باه مخبيين عليهم الموضوع الى فات ده  عشان ممكن يقولوا لحد ولا حاجه

اعتذر للكرامه والامن القومى المصرى  والسياده

الى اتفكرت انهم ضاعوا اكتشفت العكس بالكليه فما حدث اننا برده بنهرب لحماس اى حاجه هما عايزينها والدنيا لما قفلت علينا خالص قمنا ايه عاملين اننا بنبنى جدار وبتاع عشان محدش يتكلم ومن الحكمه البالغه  اننا ايه قمنا سايبين العيال بتوع مسيرات غزه وبتاع وعملنا العاب كده عشان ايه عشان نضحك على امريكا واسرائيل ههههههه

رابعا تحيه احلى تحيه لقوات امن المنوفيه

الشرطه لما بتحبس حد من الاخوان بتحبسه عشان اسرائيل ما تغتالهوش ولما تحبس حد من المدونين بتحبسه عشان الى فاكرينه كافر ما يقتلهوش يعنى زى ما قال وئيس لجنه الامن بمجلس الشورى الداخليه بتشيل تقصير الوزارات الاخرى

خامسا انى كنت فاكر اننا بناخد اوامر من امريكا واسرائيل

اه لقيت كده فعلا بس بنضحك عليهم عشان ما يضربوناش بالصواريخ وما يعملوش فينا زى الى عملوه فى العراق عرفتوا ليه باه لازم كل واحد يخليه فى نفسه ويسيب الحكومه تشتغل

.………………………………………………………………….

فى حاجات كتير لسه ما قولتهاش عشان ما اصدمكوش بس عايز اعرفكم ان الحاجات دى لما عرفتها خلتنى اانتخ فى الحياه واستمزج واعرف ان  الى انا كنت بعمله كنت غلطان فيه ويا ريت الحاجات دى ما حدش يترجمها للعبريه او للانجليزيه عشان مصر مستهدفه

.

انتبهوا لدراستكم منك ليه والى بيتشتغل ينتبه لشغله ويسيب النظام يعمل الى عايزه لانه بالاكيد ومما سبق هو الاصح

.

الى خلانى متاكد من الى بقوله التالى وهى حاجات ما تشوفهاش الا العين الفاحصه

1-تصريح نبيل لوقا بباوى الى اقترح على الحكومه انها تسكته لانه بيكشفنا ادام العدو ان ما فيش جدار ودى زله لسان المفروض نلغوش عليها عشان ما حدش يعرف ان ما فيش  جدار بجد

2- تصريح لمصطفى الفقى ان الى لازم يحكم مصر لازم يعدى على امريكا الاول ودا بننفخ امريكا على الفاضى عشان نعرفها اننا ما بنعملش حاجه من وراها احنا شغالين الله ينور وبنشتغلها احلى اشتغالات

3- لو قريت على النت هاتلاقى السيد علاء مبارك كان بيخطط لمهاجمه امريكا ودا الى خلانى اشك اصلا ان فيه علاقه بين الى  بيحصل لامريكا عشان كده اكتشفت ان الحكومه بتاعتنا هى الى عملت غزوه 11 سبتمبر

4-مصادر مطلعه اكدتلى اننا بنصدر غاز لاسرائيل فيه سموم زى ما هما بيصدرولنا  حاجات بتبوظ صحتنا وفى ظرف 100 سنه هانخليهم ينقرضوا لان الغاز ده بيوقف الخلفه يعنى بتخلى الاسرائيلى مسمار مقطوم

5-. الكويز دى لمصلحتنا والهدوم الى بندويها لامريكا بنضربها فى العمق ونخليهم يلبسوا هدوم تجيبلهم سرطانات نيااااها وشغالين الله ينو ربنا يخليلنا حكومتنا

………………………..
وحاجات كتير كتير بس ركزوا انتو وهاتلاقوا بس ما تقولوش لحد عشان الموضوع ما يوسعش مننا والى بره يعرفوه وييجوا يقتلونا

……………………………

الف شكر لكل من  ساهم فى النهضه الشامله المصريه

…………………….
هاتقولوا عليا اتجنيت بس دى الحقيقه للاسف

………………

سلام ونصيحه لكل الى بيقروا الكلام ده يانتخ كده ويركز فى مصلحته

….

عشان مصلحته كده تدوى وتكبر

.

سلاااام

……………………………………………..


………..

…………………….

…………………………………………………………………………………………


هكذا يفكرون؟؟؟؟ لهذه الاسباب ينامون مرتاحى الضمير!!!!

27 Jan

بسم الله الرحمن الرحيم

رابط مختصر :

http://wp.me/pIPns-X

بدون تعليق هاحطلكم اراء  مش مهم  الشخصيات الى قالتها بس بالفعل بتعرفك مبررات من يحكمونا فى بقاء الحال كما هو عليه

اولا مع الشخصيه الاولى :

انا:يا رب اقابلك بكره وتكون تبت كده والله راحه نفسيه وربنا معاك من قلبى لانك بجد صعبان عليا

الوطنى :يلا بقى ربنا يعينك وتلاقى الى بتدور عليه علشان تودينا فى داهيه

انا:يا عم حتى لو لقيت الى بدور عليه انتو بيهمكوا الريس مفيد شهاب رجع فى كلامه هايبقى احسن منك يعنى لا بس صياعه ان ما فيش ارشيف

تعرف يا ريس المشكله انكو طلعتوا ناصحيين وشيلتوا الارشيف كان زمانكم اتفضحتوا اكتر ما انتو مفضوحين بسبب موضوع البرادعى

بس خود الوعد ده منى لو البرادعى جه هاخشلك كليه حقوق مخصوص وهازاكر اجيب امتياز واطلع محامى كبير مله اوى

واطلع بعدها ادافع عنك هاقولهم يا جدعان الراجل ده نيته حلوه بس اصحاب السوء الى عملوا فيه كده

ومك جاى يا كبير وربنا ما بينساش يا ظلمه يالى خربتوا البلد افرح اوى باذن الله اخركم سنتين وهاتشحتوا بعدها ابقى افكرك يا ريس

الوطنى:طيب كويس انك تدخل الحقوق وتدافع عنى ..نتقابل وقتها بس ابقى خد بالك منى

ايش عرفك انى عملت خميره حلوه ..دى خميره زى الفل ..روعه وفظيعه ..تعالى خد لك شويه

ولا فرد عضلات ولاحاجه ..دى نتيجه انتخابات حره ومنظمه ودقيقه وعلانيه وفيها تنافس شريف

ههههههههههههههههههه..مبروك لمكرم ..خلى روحك رياضيه

…………………………………………………………

……………..

ثانيا مع الشخصيه التانيه :

….

مش هاكتر فى الاسئله لان الاسئله الى طرحتها على لسان كل مصرى بس الاجابات الى كتير منكم مش متخيل انه عارفها

هاقولكم الردود بس هنا لانها مالهاش دعوه بالاسئله

اتفضلوا

احمد عز مش كثرة بس مصالحه مربوطة بشبكة كبيرة مستفيدة من وجوده …هو اقوي من مليون فقير

انا :الشخصيات الى بيحترمها فى الوطنى

انا ….حسام بدراوي رغم اختلافي معاه ….ممكن اقولك هشام مصطفي خليل و ابوه من قبله و ممكن اقولك هشام الشريف …عبد المنعم سعيد

انا :هل الاغنياء هما الى هايغيروا البلد

ههههه لا هتغير البلد …مش الفقراء صدقني ..يعني انت لما تغير ال2 مليون بتوع مارينا و تغير مصالحهم كل مصر هتتغير .

انا :انتو بتنضموا للوطنى عشان الوظائف

برضه تسطيح حكاية البحث عن وظائف ..في طبعا ..لكن مش الكل و مازال هناك كثير عندهم قناعات بالاستقرار ضد الفوضي …حتي لو مش صح

انا بقولك شبكة مصالحه مش هو …و مش تغير الكلام

و عموما طول ما المعارضة فيها شباب بيسطح الامور زيك كده صدقني هتفضلوا اخركم سلم نقابة الصحفيين

انا بقولك ان شبكات المصالح المستفيدة من الاوضاع الحالية اقوي بكثير من مليون فقير لان الفقراء مش هيغيروا …الطبقة الوسطي


انت نقلت من الفكر للقيادات ؟؟؟

انا :انتو الشباب الواعى الى عارف مصلحته فين

يا ابني لو في حد واعي في البلد دي كنا اتقدمنا …بلدنا بتتخلف بينا

لا مصالح و تعالي افرجك علي شباب زي الورد مش اعضاء في الحزب و شايفين ان مبارك و ابنه الاصلح و بيشتغلوا في شركات عالمية

بفرض ان كل كلامك صح …برضه مش انتوا البديل …انتوا يدوب ده اخركم …تسطيح الامور و حدف الطوب و الاتهام بالفساد للكل

يعنى انت شايف ان الباشا جمال احق بالرئاسه صح ؟

انا شخصيا عندي مليون سبب ان جمال مبارك هو اسوأ من يقود مصر :))))مش بقولك انت قديم اوي


اننتوا حافظين شوية قوالب و صدقوني مفيش اي عمق للتحليلات بتاعتكم …و علشان كده برضه اخركم لسه سلم النقابة 😛


خلاص …. خليك اتكلم عن المنظومة الفاسدة ..برافووو…في سؤال في العلوم السياسية مهم جدا …هنعمل ايه ؟؟؟ هنصحي الصبح نعمل ايه .؟

اللي انا بقوله ان جزء من المنظومة فاسد لكن الجزء الاكبر مش كده و لكن مرتبط بمصالح حقيقية و مشروعة و انتوا مازلتم بعيد عن الاثنين

انت مش معترف اساسا بجزء المصالح المشروعة و ماسك في الفساد ..كل سنة و انت علي سلم النقابة 😛

طب والناس الفقرا نعمل فيهم ايه ؟ الى مش عارفين ياخدوا ارواكل من عند جمعيه المستقبل ؟

ما هي القضية مش كراهية و حب …اصلها مش رواية لاحسان عبد القدوس ..هي مصالح و سياسة و قوة و تأثير

و انت شايف المصالح من منظور ضيق برضه

يا استاذ انا هسألك السؤال الصح ….مين اللي المفروض يقود التغيير ؟؟؟

انا :يعتمده على طبيعه التغيير


التغيير نحو نظام فيه عدل و ديمقراطية و فرص متكافئة و متقدم زي كل الدول المحترمة اللي بنشوفها علي التلفزيون

انا :اكيد مش السبب فى الخراب ؟

مش مختلفين …بس هنختلف بقي علي تكسير الرصة دي ازاي


انا اصل افكاري كثير و غزيرة و تصدق بالله انا في الحزب الوطني و عمري ما اشتريت الجمهورية ده …انت قلبك جامد فعلا 😛

لا الاصلاح من جوة مرتبط اساسا بفكرة المصالح …شبكة المصالح المشروعة مرتبطة هيكليا بوجود حزب و كذلك شبكة الفساد ..يتبع

شبكة المصالح اقوي بكثير من الفساد …يعني في حاجات مشروعة و في حاجات مش مشروعة ..انت محتاج تفك الارتباط ده و تحسس الناس …يتبع

و تحسس الناس ان مصالحهم في كل الرصة اللي انا قولتها دي مش في دعاوي الاستقرار الزائفة

لما الناس المتعلمة المثقفة دي لوزير حق مش حقه لمجرد انه وزير يبقي هنا بقي محتاجين نفك الارتباط ده بين المصالح و الفساد

ماازل الحزب الوطني رغم كل مشاكله هو المعبر عن مصالح القطاعات اللي تملك التغيير الحقيقي و اللي هي مغيبة تماما او اعضاء في الحزب

طبعا مع عدم اغفال غياب البديل : P

وانهو وزير باه الى انت قولتله ما تقافش فى الممنوع بتاع التنميه الاداريه صح ؟

هههه كان احمد شفيق و مكنتش اعرف انه رئيس مجلس امناء مارينا …و التانية اقوي من الاولي

علي فكرة انا قولت لجمال مبارك شخصيا علي حكاية الناس المحترمة دي

انت بتتكلم علي الوزير …لا قولتله عالطول و حتي الحارس كان بيبص ليا شذرا

و علي فكرة و حياة امي انا عمري ما في حتة بقول انا في الحزب ولا بجيب سيرة حتي انا عامل 3 محضر لوزير الداخلية في المطار و مش قولت

و عامل 3 محاضر لوزير النقل السابق و محضر المطار كان بسبب انهم مش حاطين يافطة ان الركن ممنوع و لما صاحبي ركن قالوا هات مخالفة

و قولت للظابط الوزير بتاعكم بيلم اتاوة و انا هعمل محضر 🙂 قالي انت بتشتغل ايه قولتله مواطن …تصدق سكت 🙂 مش هتصدق انت انا عارف

انا :طب من الاخر كده شايف ان على ايديكم الاصلاح بعد اد ايه؟

هههههه ابقي قابلني البلد دي عايزة ثورة 😛 😛 ههههههههه

انا : بس الثوره دى هاتحاكمكم ؟

يا سيدي مفيش محاكمة و لا بتاع انا مش اخدت جنيه من الحزب انا مديون اساسا …تهمتي ايه يعني ؟؟؟ انا مليش تهمة …

اخرها هتحرم من ممارسة السياسة و كده كده البلد مش فيها سياسة اساسا نمارسها

http://masreliba7ebaha.blogspot.com/2008/03/blog-post_15.html انا كتبت ضد الامن هنا علي فكرة علشان مش تقول مش بيكتب

و سلام يا سيدي سعدت بيك و الله

النظره البرادعاويه للحاله الطائفيه المصريه

17 Jan

بمسي بمسى على الجميع ….هاكتب انهارده حاجه مختصره كده عن موضوع الساعة الى فاتت ههه طبعا الموضوع الى هاتكلم عليه ده قتل بحثا زى ما بيقولوا بس طبعا زى ما انتو عارفين إن مدونتي لازم لما اكتب فيها

حاجه اكتبها من قلبي بعيد عن اى تأثيرات للصدمة او غيره وبعد تحليل للموقف واستشراف حلوه استشراف دى المهم ومعرفه الناس من كافه التوجهات بتفكر ازاى وقراءه

كل التوجهات وخلصت بجد الى حاجه بإذن الله هاقولها من غير ما أطول عليكم طبعا الموضوع وردات الأفعال من كافه التوجهات مش هاكررهالكم بس عايز أنقلكم واشتغلكم شويه واطلع عليكم ما فعله النمر بى النهار ده في الامتحان وأقولكم النظرة البرادعاويه للفتنه الطائفية او العنف الطائفي في مصر

لو عايز ين رايى ممكن نعتبرها عنف طائفي مش فتنه ليه عشان فعلا الموضوع على أساس ديني واى واحد يقول غير كده يبقى مش مظبوط وإلا ليه أشمعن كنيسة  واشمعن يوم عيد ومش عايز اكرر الكلام ده المهم

البرادعى شايف ايه فى الموضوع ده طبعا هو ماله لا ماله ونص وتلات تربع مش هو الى هايمسكنا يا رجاله المهم الباشا شايف حسب  توقعاتي التالي

1-أولا لو كان البرادعى هو رئيسا “طبعا مع منظومة برادعاويه”مش طبعا الريس كل حاجه هايبقى ده الحل فعلا إن الأمن مش هايستنى تأملات البرادعى فى الحياة عشان ينفذ بل سيحكم الأمن الدستور والقضاء فكنا قصينا الموضوع من اوله

2-طبعا ممكن اى حد منفعل يقولى طيب يا عم البرادعاوى موضوع الاغتصاب والكلام ده لو كان أتحل كان ممكن الموضوع ده يحصل برده أقوله على الأقل لو هو مش سبب ما كانش أتبرر لاى مسلم متعاطف مع المسيحيين سبب قد يقلل من تعاطفه مع الحدث الجلل

3-المسيحيين مظلومين وظالمين في نفس ذات الوقت عشان كده في الدولة البرادعاويه  سيقلل من الظالمين والمظلومين الى قدر الإمكان  طبعا ظالمين المسيحيين كل الناس عارفه ليه طب مظلومين دى عشان حاجات كنير ممكن تخش على اى موقع للأقباط بس المواقع المحترمة وتشوف الحاجات الى بتتعمل في مصريين زينا ومش عارفين ليه بس بجد الموضوع الى “باضنى اوى ” موضوع إنهم ما بيدخلوش قسم الولادة في طب  مش عارف ليه واشمعن الولادة  طب الوقتي لو واحده مسيحييه عايزه تولد تروح لمسلم  ما لا ترضاه لغيرك لا ترضاه لنفسك “مع إن الموضوع بيبقى مقرف  هههههههه”اساسا

4-فى دوله البرادعى الجهل على اقل مستوى فلن يظهر أبدا من يبرر الحدث طبعا انا ما بكلمش عن المواقف الاسلاميه المعلنه لان الاخوان والجماعه الاسلاميه والسلفيين ادام الاعلام ومن ورا الاعلام على فكره ليهم نفس الراى بس انا بتكلم عن المسلم العادشى والمسيحى العادشى المفروض اى مسلم ومسيحى عادشى يكون ليهم نظره واقعيه للامور مش هبل بيتقال فى الشارع من المسلمين والمسيحيين على السواء العاديين طبعا

5-هاختم بحاجه بسيطه قالها البرادعى فى احد لقائاته قال “الناس بتتكلم عن العلم والتقدم ومحاربه الفقر والرفاهيه واحنا لسانا بنقول سنه وشيعه مسلمين ومسيحيين ” واضيف انا اصل دا العادى بتاع شعب يعيش فى هذه الفتره الخرويه من تاريخ مصر

كفااااااااااااااااااايه كدا عليكو النهارده طبعا مش كل حاجه كنت عايز اقولها قولتها بس عشان ما اطولش عليكو وعشان اديكو شويه امل بس اقولكم  ان المسيحيين هاينتخبوا البرادعى وبداو يدعو على النظام يعنى فى امل ان يحصل زى الى حصل من تلاتين سنه  امنوا وراء المسيحيين وقولوا امييييييييييييييييييييييين

………………………………………………………………………………………………………..

انتظروني في تدوينه جديدة مفرقعه انشرها بعد الامتحانات

%d bloggers like this: